الأخبارمحلي

تجمع الحرفيين بالخرطوم يكشف عن موقفه بشأن مواكب 6 أبريل

هوي يا فرد، يا معلمين المكانيكا والخراطين خشب وحديد، نجارين، منجدين، بتاعين المغالق، ناس المطاعم و الدكاكين، حدادين واطة، بتاعين اسبيرات، حدادين عديل، بوهيجية، وسمكرجية.

عارفين الرصة طبعاً، أيوه يوم السبت الغنجة الجد، بنمرق كلنا كده وبهدوء وهتافنا أول حاجة سلمية، سلمية دي يا فرد سلاحنا آآآي عشان الثورة دي بدت سلمية ولازم تستمر سلمية، يعني كسير ما دايرين وعداوة مع الناس في الشارع ما دايرين، نهتف هتاف مرتب أيوة، نشيل لافتات أيوة، نغني غُنا الثورة ونمرق في الزلط أيوة.

نطالب بالكهرباء نطالب بالمواد الرخيصة نطالب بتصحيح البيئة (خيران ونفايات وغيره).

يلا شدَّو حيلكم ، لجانكم وشغالة، وبتصلكم بياناتكم وملصقاتكم، عارفنكم ما بتريدوا الكلام الكتير بس كمان الكلام المية مية ما كعب.

عندكم قيادات منكم وفيكم يسدوا عين الشمس، عرفتوا الرصة حقت السبت 6 ابريل، مواكب السودان الوطن الواحد؟!

الما بشارك حقو برضو يتضامن مع الثورة وعلي الأقل يقفل محله ويمشي خطوتين كده في شان البلد ..

تجمع الحرفيين بالعاصمة المثلثة

الخرطوم: حلايب نيوز

الوسوم
اظهر المزيد

مقالات ذات صلة

إغلاق